الجزء الثالث
نادر:مرحبا
مها:يؤبرررني جمالو الحلوو
سنا:و اخيرا جبتو لعناا....تعال ياعمري انت
نادر:هههه طولو بالكن عالصبي نايم
مها:اي هاتو بدنا نفيقو يؤبرني شو كبران
سنا:تعالي روح....تعالي شوفي ابن خالي شوحلو يؤبر قلبي
نادر:هه يلا هتمو فيه انا عندي شغل بدي اقضيه وبرجع
مها:ماتاكل هم روح هون وهيه بتعرف تنتبه الو
نادر:فيني اعتمد عليكي انسة روح؟؟
ماكنت فايقة من صدمتي بشوفتو فايت وحامل ابنو الصغير بالكرسي تبعو....ليصدمني مرة تانية و يطلب مني انتبه عليه....قلبي كان رح يوقف و بلش الحزن يتسلل لجواتي...اخدت نفس و طلعت فيه وابتسمت
روح:ماتاكل هم...انا بنتبه الو...بس بعد اذنك ماتتأخر لان لازم روح على البيت
نادر:لا لا ساعة بالكتير بس في شي مهم بدي اعملو و برجع
روح:(ابتسمت ابتسامة باهتة)ماتاكل هم
نادر:تفضلي هي الشنتة فيها غراضو
روح:اوك
نادر:طيب....بالاذن
_قربت من البيبي شوي شوي....كان نايم متل الملاك
و مجرد ماشفتو حسيت انو الله القى محبتو بقلبي....حملتو بين ايديي و كأنو ابني وعم احملو لاول مرة...كان صغير...حلو...بشرتو ناعمة و بيضا متل التلج
رموش عيونو طوال وسود و خدودو متل التفاح_
مها:حلو كتير موهيك
روح:كتير....شو اسمو؟؟
مها:تيم
سنا:ريان
روح:تيم و لا ريان؟
مها:بعمرك مارح تركزي انتي...اسمو تيم...امو كانت مسميتو ريان بس خالي غير اسمو لتيم
روح:احم....خالك متزوج؟
مها:(ارتبكت و اصطنعت الابتسامة)مطلق
روح: و ام تيم وينها؟
مها:سافرت
روح:اممممم
سنا:عطيني ياه احملو شوي
روح:تفضلي.....اديش عمرو تيم
مها:ست شهور
روح:ياعمري....صغير لسا ليعيش بدون امو
مها:(رفعت كتافها و لوت شفافها)هيك صار
سنا:روح انتي بتعرفي تهتمي فيه مو هيك
روح:ههه طبعا....ما انا دارسة تربية
سنا:دخييييلو الحلو
___________
_بعد ايام كنا قاعدين بصالة البيت و تيم نايم بحضني و نادر برات البيت.....ماجدة رايحة و جاية بقلق بالبيت
دقايق و اندق الباب ومع فوتة نادر نزلت مها عالدرج عم تبكي و حضنت نادر_
ماجدة:تأخرت الضيوف على وصول
نادر:كان عندي بروفا....شبكي خالو...ليش هيك مقهورة
مها(صرخت)بدهااا تتزوجوووو.....بدها تنخطب و تتزوج
نادر:يامها موحكينا بهالموضوع و اتفقنا انو امك حرة بحياتها
مها(صرخت على امها)مااالك حرة...عم تسمعيني ماالك حرة...مارح تتزوجي لهاد الزلمة...مو بوجودي بهالبيت ابداااا عم تفهمي
ماجدة:حبيبتي مها بترجاكي فهميني....انا....انا عشت عمري وحيدة...من حقي لاقي كتف استند عليه بكبرتي...من حقي يكون عندي حدا يهتم فيكي
مها:لاااا....انتي من حقك تهتمي فينا و بس....انتي واجبك تربينا و تكبرينا...مو من حقك تجيبي رجال غريب على هالبيت و تخلي ياخد مكان بابا ممووووو من حقك
ماجدة:ماحدا بياخد مكانو بس انا تعبت....تعبت و الله تعبت
نادر:خلصنا مها....فرطيها هلأ....خلينا نكتب الكتاب و بعد مايروحو الجماعة منحكي
مها:ماااارح ينكتب شي....انتي مارح تتزوجي هاد الزلمة...عم تفهمي مارح تتزوجي
نادر:اوووف....روح حكيلك كلمة مع مها
قمت من مكاني و حطيت تيم بالكرسي تبعو و رحت لعند مها مسكت ايدها لنقعد على جنب و نحكي...بس حضنتني وصارت تبكي اكتر
مها:(تبكي)بترجاكي ياروح لاتخلي ماما تتزوج هاد الزلمة مشاان الله
روح:خلص ياعمري...اهدي شوي مابيصير هيك
مها:مابدي امي تتزوج
روح:(مسحت دموعها و رفعت شعرا عن وجها)
مارح تتزوج هلأ....رح يخطبو بس خطبة واذا شافتو مو مناسب الك و لسنا رح تتركو فورا...امك عندا راحتكن بالدنيا كلها ومارح تترك شي يدايقكن
ماجدة:عندي راحتكن قبل راحتي....بس خليني عيش يومين بسعادة
مها:المفروض سعادتك تكون معنا و بس
ماجدة:خلص انا مابقا اقدر ناقشها...روح خديها لغرفتا و هديها
روح:حاضر ست ماجدة....تعالي مها لنحكي فوق
مها(غصت و حكت بصوت مكسور)مارح سامحك ماما مارح سامحك
نادر:معلش اذا جبتلك تيم روح؟كرمال مايبكي ادام الضيوف
روح:اكيد...انا رح اسند مها عالدرج...حملو انت و طالعلي ياه
نادر:اوك
بغرفة مها....رمت مها حالها عالتخت و رجعت تبكي...قعدت جنبها و طبطبت عليها دقايق و انفتح الباب و دخل نادر و حط تيم عالكنباية الي مواجه التخت....قامت مها فجأة و طلعت فيني كيف عم طلع بنادر وهو طالع و بس طلع حكت معي
مها:انتي كمان!!!
روح:شو انا
مها:انتي كمان بدك تحبي و تنحبي و تتركينا
روح:عن شو عم تحكي
مها:بدك تتركيني شي يوم؟
روح:(بارتباك)ههه انا!!
مها:اي انتي
روح:انا مالي بقيانتلك لاخر عمرك...انتي سنة تانية ومارح تحتاجيني
مها:انا بدي ياكي تبقي معي على طول
روح:حاضر رح ابقى معك على طول
مها:سمعيني.....انا بدي اطلع مع خالي على بيروت...بدي عيش عندو....مافيني شوف رجال غريب فايت على بيتنا
روح:ليش خالك ايمتا مسافر
مها:بعد يومين....بدي ياكي تروحي معي
روح:بس انا مابقدر
مها(تبكي)لاتتخلي عني متل امي مشان الله...تعالي معي...منقعد فترة ببيروت بينما امي تفك خطبتها
روح:بس انا عندي اهل مارح يسمحولي
مها:الا ماتلاقي طريقة تقنعيهن و اذا ماقتنعو منخلي امي تقنعهن
روح:يامها انا شايفة انك تتقبلي الواقع
مها:لااااتقولي اتقبل الواااقع....مارح اتقبل شي
روح:طيب طيب...هدي...بفكر بالموضوع
مها:فكري بالموضوع
_________
بصالون البيت
عادل:مبروك حبيبتي(باس ايدها)
ماجدة:الله يبارك فيك
سنا:مبروووك ماما
ماجدة:تؤبريني يبارك فيكي
عادل:شو سيد نادر مابدك تسمعنا شي بهالمناسبة السعيدة
نادر:طبعا رح سمعكن...خليني جيب الكمان من غرفتي بس
طلع ركد عالدرج و التقيت فيه براس الدرج
نادر:كيفها مها
روح:هلأ نامت بعد ما بكيت كتير
نادر:بكرا بتهدا
روح:مو هيك شكلها...بدا تطلع معك على بيروت وتعيش عندك
نادر:عنجد!!!!
روح:اي والله....وبدها تاخدني عيش معها كمان
نادر:انتي؟؟ليش!
روح:مافيها تعيش لوحدها
نادر:اوووف...الظاهر مارح تمضى على خير
روح:تيم عم يبكي خليني شوفو
نادر:طيب
_دخلت على غرفة مها و عطيت تيم الحليب تبعو...وسمعت عزف نادر عالكمان و كانت الموسيقى حلوة و سعيدة على عكس ماتعودت اسمع منو....اضطريت بهالليلة نام عند مها لانو كانت كل شوي تصحى مرعوبة و تحتاجني كون جنبها لهديها
كانت ليلة طويلة و صعبة....واللي هونها شوي هو وجودي مع نادر بنفس البيت....و احساسي بنفسو كان عاطيني امان و احساس ماحسيتو من قبل_
بعد يومين
نادر:اي انسة روح....انا حابب تكوني مربية لابني تيم
روح:انا؟؟
نادر:اي...انا شفت اديش ابني تعلق فيكي و اديش عم تعرفي تتعاملي معو
روح:انا صعب سافر على لبنان
نادر:انا جاهز للاجر الي بتطلبي
روح:مو قصة اجر انا بس وضعي صعب
نادر:صدقيني انو بلبنان كل 15 يوم كنت غير المربية تبع تيم...اما انتي حبك وتعلق فيكي...حاولي تخلي اهلك يوافقو
روح:طيب...عطيني وقت لاقدر اتفاهم معهن
نادر:انا اجلت سفري لبعد بكرا الصبح..فياريت بكرا المسا ترديلي جواب
روح:طيب...خليني امشي هلأ
نادر:مع السلامة
كل الطريق و انا مشغول بالي كيف بدي اقنع عمي و مرت عمي بسفري هاد....خاصة انو مرت عمي ناطرتني على كلمة...وصلت عالبيت بدلت تيابي بغرفتي و رحت لغرفة القعدة الي قاعدين فيها عمي ومرتو وولادة
روح:مسالخير
ام فهد:اهلين !!شرفتي
ابوفهد:وينك لهلأ لك عمي
روح:والله بشغلي وين بدي كون يعني
ام فهد:اييه...الله يخلصنا من هالشغل
روح:(تنهدت بملل)عمي...بدي احكي معك بموضوع
ابوفهد:احكي عمي
روح:ماجدة خانم بنتها مسافرة على لبنان و بدا ياني سافر معها
ابوفهد:على طول يعني
روح:مو على طول فترة بينما تزبط امورهن بالبيت
ابوفهد:لا مافي روحة خليكي هون
روح:رح تعطيني راتب مضاعف
ام فهد:اديش يعني!؟؟
روح:مابعرف
ابوفهد:انا قلت لا
روح:عمي الله يخليك
ام فهد:سمعي...اذا بدك تروحي منخليكي بس بشرط
روح:شو الشرط
ام فهد:بتتنازلي عن حصتك بالبيت
روح:نعم!!!!!
ام فهد:مافي غير هالكلام مو هيك ابوفهد
ابوفهد:اه؟؟اي عمي...اذا بدك تسافري بدك تتنازلي عن حصتك بالبيت
روح:و وين بدي اصفا بس ارجع
ام فهد:بترجعي بتقعدي عنا بعد ماتكوني تنازلتي عن حصتك
روح:عمي هاد الي طلع معكن!
ام فهد:والله شو بيضمن النا انك ماتتزوجيلك واحد لبناني ويجي ياخد حصتك من البيت و يقلعنا او يجي يقعد بنص البيت بوجهنا!!
روح:بس انا مو رايحة اتزوج انا رايحة اشتغل
ام فهد:هاااد الموجود....بدك تروحي بتتنازلي عن حصتك بالبيت وغير هيك مافي حكي ولا شو ابو فهد!
ابوفهد:اي عمي...كلام مرت عمك مزبوط...جيبي ورقة كتبيلي تنازل عن حصتك و بعدين سافري لوين مابدك
_سكتت وطلعت فيهن....اديش هنه استغلاليين!!!مستغلين حاجتي للسفر كرمال ياخدو حصتي بالبيت
فكرت بيني و بين حالي..تخيلت صورة نادر و كيف رح عيش معو بنفس البيت و شوفو كل يومو بكل وقت
كيف رح تكون حياتي اذا سافر و تركني و حاجة مها الي بهالوقت العصيب....حسمت قراري....رحت جبت ورقة و كتبت التنازل و وقعت عليه و رحت لغرفتي ضبيت غراضي و تاني يوم المسا خبرت نادر عن قراري و الصباح الي بعدو كنا على طريق بيروت بسيارة نادر
#يتبع
#الجزء_الرابع
@rwayate
نادر:تفضلو اهلا وسهلا
مها:بيتك كتير بعيد عن المدينة خالو
نادر:هيك احسن....فوتي روح لاتستحي
روح:شكرا
نادر:هاتي تيم عنك
كان البيت من طراز الاكواخ....مؤلف من طابقين..بالطابق الارضي طقمين كنبايات و مطبخ اميركي مفتوح و شاشة تلفزيون كبيرة....البيت كتير كان حلو و دافي و بيشبه نادر بشكل كبير
نادر:هون غرفة الاعدة....عاليمين غرفة مكتبي و استديو صغير للموسيقى....و فوق غرف النوم،غرفتي و غرفة لتيم و غرفة للضيوف
مها:حلو...انا بنام مع تيم و روح بتنام بغرفة نوم الضيوف
نادر:هيك منيح....شو رأيك روح
روح:اه؟؟اي مافي مشكلة
نادر:طيب....ارتاحو و رتبو غراضكن بغرفكن على بين ما انزل جيب غدا و ارجع
مها:مع السلامة خالو......اااه..شايفة شو حلو البيت و مريح
روح:اي حلو
مها:شبكي روح مالك على بعضك
روح:مافيني شي تعبانة من السفر بس
مها:الحق معك....ماقلتيلي كيف رضيو بيت عمك
روح:ههه....قبلو..بطريقة ما
مها:منيح كتير....هون رح نكون نحنا التلاتة بس..مافي حدا يزعجنا
روح:معك حق....رح شغل الموقدة مشان نتدفا...الدنيا برد كتير
مها:اوك...و انا طالعة رتب غراضي فوق
_تأملت البيت....روح نادر فيه....صح انا اجيت معهن بملئ ارادتي بس على امل اني اربح شي بدال الي خسرتو...بس شكلي مارح اربح شي....بلشت تمرق الايام
و كل يوم بيشبه الي قبلو....عنايتي بتيم و حبي الو
و حبي لنادر الي عم يكبر كتيييير بوجودو معي و سماع موسيقتو كل يوم....بهالفترة لجأت للرسم لعبر عن الي جواتي...صرت ارسم نادر وهو شارد اغلب الوقت
وهو عم يعزف عالكمان و عيونو مغمضين....حركات ايديه و ابتسامتو الباهتة
رغم بعدو عني....وعدم شعورو فيني...والسر الي مخبيه بحياتو....انا كل مالي عم حبو اكتر و اتعلق فيه اكتر
و بعد فترة و بعد مابلشت مها دراسة و دوام بالمدرسة هون....بليلة باردة كان نادر بحديقة البيت و عم يعزف على كمانو اغنية ياحبي الي غاب....نيمت تيم و نزلت لشوفو قبل مانام_
روح:على فكرة عزفك هي الاغنية بيجنن
نادر:يمكن لانها طالعة من القلب
روح:يعني عم تبكي على حبك الي غاب
نادر:__
روح:انا رح نام...تصبح على خير
نادر:روح!!!
روح:نعم
نادر:تعالي خلينا نحكي...حاسس حالي بحاجة اني احكي لحدا
روح:تفضل عم اسمعك
نادر:يمكن....عم تسألي حالك عن الحزن الي مخيم على قلبي و حياتي بشكل عام....او الهدوء و الصمت الي انا فيه...موهيك
روح:مبلا هيك
نادر:"ياحبي الي غاب...من عمري انا"
"حياتي عذاب...انحرمت الهنا"
تركتني و هربت بليلة مافيها ضو قمر...تركت عندي طفل عمرو ايام....وهربت مع حبيبها
روح:حبيبها!!!
نادر:ههه....(تنهد)كنا سوا...بنفس الشركة..اشتغلنا سوا...هيه كانت سكرتيرة المدير...و انا مهندس بهالشركة حبيتا بجنون
و ماصدقت ايمتا اجت الفرصة الي تقربت منها فيها
روح:شو كانت هالفرصة؟
نادر:الفرصة انها تركت المدير الي كانت تحبو.وكان في علاقة بيناتهن..بعدما تركتو...فورا انا دخلت عالخط...و عوضتها عن غيابو و عن خيانتو الها
روح:اي؟؟
نادر:اي....انا كنت اعمى....ماكنت شايف ادامي...ما كنت شايف انها عاملتني وسيلة لتغيظ حبيبها و تخلي يغار عليها....حبيتا بجنون...عشقتها بشكل مابيتصورو عقل....عرضت عليها الزواج و جكر بالمدير وافقت عليي
خلال فترة قصيرة تزوجنا و قعدنا ببيتي...موهاد البيت
غيرو....اول فترة كانت متل الحلم بالنسبة الي....وكابوس بالنسبة الها....كانت باردة معي...ناشفة...انقلبت بعد الزواج و عرفت انها عملت غلط كبير ومابينغفر...مافي شهرين كانت حامل...وبعد 3 شهور من حملها...بكتشف مكالمات بينها و بينو
تخانقنا...بهدلتا عيطت عليها بس ما فهمت...كانت بوجهي شي و بضهري شي...بقيت تحكي معو....صرت اعمل حالي موشايف لانو بدي ياها تبقى معي...لاني بحاجتها تكون جنبي...كنت بحاجتها لاقدر اتنفس
امتنعت عن العزف كرمالها لانها مابتحب الموسيقى
عم تتخيلي اديش ضحيت كرمالا....كل هاد وهيه غرقانة بالندم لانها تركتو و تزوجتني...كل هاد و هيه حاسستني غلطة و بدها تصححها....سايرتا كتير و حاكيتا كتير و خبرتا اني بحبا و رح سامحها ..استغلت طيبتي و حبي
و بلشت تطلع معو وهيه حامل!
حامل بابني....انا كنت حاسس...كنت شايف...بس طولت بالي عليها...كنت ناطرها بس لتولد حتى اعمل اللازم معها
ماكنت بعرف انها ناطرة الولادة اكتر مني....(يبكي)لك....لك صار يجيني اخبار من الناس الي شافوهل بالمطعم الفلاني و المقهى العلاني معو
صار يجيني اخبار انها يوم عالبحر و يوم بالجبل و يوم بجهنم الي تاخدها...معو...معو...فضلتو عليي
وسكتت....سكتت....لحد ما اجا اليوم الي ولدت فيه
جابت ابني عالدنيا و سمتو ريان...وبعد ماولدت بايام....اجا اليوم الي صحيت فيه الصبح....لقيتها هربانة و تاركتلي رسالة تعتذر مني فيها....وتركت طفل ماتجاوز عمرو العشر ايام
روح:رسالة اعتذار!!!!
نادر:هه شايفة...اعتذرت لانها ماقدرت تحبني...ولانها مارح تقدر تربي ابني....حكت عنو وكأنو ابني لوحدي مو ابنها
روح:ولسى بتحبها؟؟؟
نادر:مو حب....صعب تفهمي عليي بشو بحس...بس كتر الوفا بيقهر
روح:بس هيه اسفة على هالتعبير....حطت راسك بالوحل
نادر:لاتعتذري...بعرف انها حطت راسي بالوحل و شوهت سمعة ابني ليوم الدين....بس الحب مو بالايد
روح:و بتعزفلها ياحبي الي غاب!!!!!
نادر:قلتلك مارح تفهمي عليي....الاثر الي تركتو فيني صعب ينمحى
روح:بحياتي ماشفت هيك رجال
نادر:ولا رح تشوفي...بعد ماتركتني غيرت بيتي و غيرت شغلي و غيرت اسم ابني
روح:اكيد رح تعمل هيك...بس الي عملتو ترك بصمة مارح تنمحى للابد
نادر:شو بدي اعمل!!هاد الي صار....لهيك بهرب للموسيقى و للعزف لحتى انسى شوي
روح:فيني اسالك سؤال؟
نادر:تفضلي
روح:احم.....(بلعت ريقي)يعني...انت متأكد انو تيم ابنك!!انا اسفة بس السؤال طرح نفسو
نادر:عادي....ماقدرت عيش مع الشك كتير...طبيعي اني شك اذا كان ابني او لا.....بعد 10 ايام من هربها عملت تحليل DNAمع انو كلفني كتير....بس عالاقل اكدلي انو هو ابني ومن لحمي ودمي.....و الا كنت رميتو لاهلها يتكفلو فيه
روح:اهلها شو موقفن
نادر:اهلها تبرو منها و وقفو معي
روح:منيح
نادر:بتعرفي ليش حكيتلك قصتي؟
روح:ليش؟
نادر:حتى قلك مابقا تحبيني....شيليني من بالك لاني مارح اقدر حبك
تمنيت الارض تنشق و تبلعني ولا اسمع هالحكي منو....خجلت كتير و وطيت راسي....و اطرافي تلجو من هالحكي و من الموقف الي انا فيه
نادر:انا حاسس فيكي...وشايف نظراتك الي عم يلاحقوني كيف ماتحركت....شايفك كيف بتراقبيني لما بعزف و كيف الحاني بتاخدك لمكان بعيد....بس(تنهد)انا مو صالح للحب!!انا قلبي هرب معها لما هربت...ومارح اقدر حبك مع اني صدقيني بتمنى لو اقدر...بس مابقدر
يمكن لساتني بحبها...يمكن انا وفي الها رغم الغدر....مابعرف...بس بترجاكي نسيني و شيلي حبي من قلبك لانك رح تتعزبي بدون جدوى
روح___
نادر:بعرف كلامي قاسي...بس اوقات الي بيجرح بيداوي
انا بحاجتك كمربية لابني لانك احن من امو عليه....بس مو كحبيبة الي لانو قلبي كل حنية الدنيا مارح تحركو
روح:(غصيت بانفاسي و اختنقت و غصب عني نزلو دموعي و بكيت)
نادر:بترجاكي لاتبكي...انا حكيت هيك لخفف عنك عذاب و وجع رح تدوقي بحبك الي............روح!!.....
_قرب ايدو من خدي ليمسح دموعي....بس تركتو و ركدت لجوات البيت....رحت لغرفتي و قفلت الباب عحالي و بكيت....بكيييييت كتير...لحتى نمت و دموعي على خدودي...صحيت تاني يوم مريضة...ومالي قادرة ارفع راسي...بقيت كل النهار مسطحة بالتخت و سمعانة اصوات تيم و مها ونادر....مها اجت دقت عليي الباب اكتر من مرة بس ماجاوبتها...وتيم بكي كل النهار وهو عم يدور عليي...بس ماقدرت اطلع و حط عيني بعيون نادر....بقيت يومين بعدها على هالحالة....لا اكل ولا شرب
و بكي كل الوقت....وبعد يومين...وبعد ماراحت مها على مدرستها...اجا نادر و نقر على باب غرفتي_
نادر:روح....روح...فتحي الباب اذا بتريدي
روح___
نادر:يا روح تيم صرلو 3 ايام عم يبكي بدو ياكي فتحي حرام عليكي
روح___
نادر:فتحي خلينا نحكي كلمتين
روح:مافي شي ينحكى!!
نادر:حرام عليكي يلي عم تعملي بحالك صرلك 3 ايام بلا اكل و شرب مابصير هيك بكرا بيصرلك شي
روح: وانت شو بيهمك
نادر:مو معنى اني قلتلك اني موخرج حبك يعني انك مابتهميني بالنهاية انتي صرتي فرد من عيلتي
روح:(تبكي)انا مربية ابنك مو اكتر
نادر:فتحيلي الباب بترجاكي
روح:مارح افتح لحدا
نادر(بعصبية)روح....فتحي الباب احسن ما اكسرو
روح:متل ماكسرت قلبي
نادر:انتي لسا مابتعرفيني لما عصب روح!!!
روح:مابعرفك و لابدي اعرفك
نادر:(خبط الباب بايدو)روح!!!!فتحي عم قلك
روح:مارح افتح لحدا
نادر:طيب!!!!
بلش يخبط الباب بكتفو....وما فتح معو....حنى خبطو برجلو.....انكسر قفل الباب و دخل لعندي و وجهو احمر و عروق رقبتو بارزة و عم يلهث
نادر(بصوت عالي)شو الي عم تعمليه فهميني!!!!
روح___
نادر:شو عم تحاولي تثبتي بهالشي!!!
روح:ماعم حاول اثبت شي!!!
نادر:قلتلك شو الي خلاني احكي معك هيك....مابدي ياكي تتعلقي بوهم
روح:اصدك مابدك انخدع متلك موهيك....مابدك اني كون ضحية خيانة متلك...مابدك ياني حب حدا هو مو الي من الاصل و ماشايفني...مابدك ياني كون عميا و جدبة وشوفك حابب غيري و مخلص لغيري و رغم هيك ابقى مصرة على حبي الغبي الك.....تماما" متلك!!!
نادر:(بعصبية)لاتكبري بالحكي
قمت وقفت مواجهو و رفعت اصبعي بوجهو و استجمعت قوتي لاحكي
روح:بالعكس....ماعم كبر....هاد انت!!!....مع انها ماشافتك بس انت شفت الدنيا فيها...بالوقت الي كانت عاملتك تسلايتها كنت عم تغرق ببحر حبك الوهمي....وهلأ و لبكرا و لبعدين رح تبقى متعلق بخيوط الهوا متل المجنووون
نادر:رووح لاتغلطي احسنلك!!!
روح:رح تطالع عصبيتك عليي....وهديك الي.......ههه
ماعرفت تقلها كلمة.....انت......انت.....اننن
زوغل نظري و صرت شوف 3 من نادر ادامي و الارض دارت فيني...حسيت رجليي ماعاد حملوني و الصورة صارت سودا
صحيت تعبانة كتير و راسي واجعني.....طلعت حواليي لقيت نادر حامل تيم و واقف عالشباك...و عالكرسي قاعدة مها و مركية راسها عالتخت
روح(بصوت مبحوح)مها!
مها:صحيتي روح!!....الحمدلله عسلامتك
نادر:صحيت!!....(تنهد بتعب)خوفتينا عليكي
طلعت بتيم كيف ضحك لما شافني و ابتسمتلو بحزن ومديتلو ايديي ليجي لحضني
روح:تعا ياعمري
تيم:ما....ما
بكيت لما سمعتو عم يقلي ماما لاول مرة ولو كنت امو عنجد ماكنت رح افرح هيك....اخدتو لحضني و ضميتو و شميت ريحتو و بقي بحضني اكتر من ساعة وهو رايق وماعم يبكي ابدا
مها:هاتي عنك...خالي راح يجبلك اكل
روح:مالي نفس
مها:الدكتور قال عندك سوء تغذية و فقر دم لازم تاكلي لتعوضي شوي
روح:(هزيت براسي)نشالله
مها:على فكرة انا سمعتكن هداك اليوم
روح(باستغراب)شو سمعتي؟
مها:حديث خالي معك بالليل...هو معو حق...مابدو ياكي تتعزبي معو
روح:اوووف...رجعنا لنفس الحكي!!!
مها:يا روح صدقيني هو حكا لمصلحتك
روح:طيب...خلص عتبروني نسيت الموضوع منيح هيك انا هون لاهتم بتيم و بس
مها:بس سمعيني!!انا الحق عليي
روح:(باستغراب)بشو الحق عليكي!!
مها:انا الي قنعت خالي يجيبك تعيشي معنا...ضليت عم احكي معو ساعتين لحتى اقتنع و رضي يوظفك مربية لتيم
روح:يعني هو ماكان بدو ياني من الاساس!!
مها:هو كان حاسس عليكي و عرفان انك اذا عشتي معو رح توصلي لهون
روح:و انتي ليش مانبهتيني!!
مها:لاني بحاجتك...بحاجة تكوني معي و تيم كمان بحاجتك ماشفتي كيف قلك ماما
روح:واضح اني ابتليت بالولد و ابو الولد
مها:لاتزعلي..خالي مجروح وبدو وقت ليشفى
روح:عادي مالي زعلانة...(تنهدت)الوقت بيحل كل شي
_بنفس اليوم طلعت من المشفى و رحت للبيت
كان نادر مصلح باب غرفتي....طلبت منو ينقل تخت تيم لعندي.... وصار ينام عندي كل ليلة....تعلقت فيه كتير وتعلق فيني اكتر و صار يقلي ماما وهالشي مادايقني ابدا.....بعد فترة نسيت زعلي من نادر ورجع قلبي يدقلو بس بدون ما اظهرلو اهتمامي وبدون مايحس عليي
و بدون حتى ما احكي معو....كنت كاتمة حبي بقلبي و عم ياكلني من جوا و يقضي عليي
كنت كل يوم ادخل على غرفتو و اسمع تسجيلات عزفو مرة و تنين و تلاتة....كنت اسمع "ياحبي الي غاب" و اتعذب اكتر ...اتعذب نفس عذابو وهو عم يعزفها
كان عندو اكتر من كمان....كنت المس اوتارهن...كنت فتش عن محل لمساتو عليهن بس لالمسو....تعذبت كتير بهالحب....ماكنت عرفانة انو لعنة..حلت عليي بسبب وتر كمان_
#يتبع
تعليقات
إرسال تعليق